Takdire Semar

wis dadi tekdire semar

pangalok-aloke kudu kasamar

ngerti marang dununge batur

ora kena blaka ngeculake pitutur

wibawa bendara bisa luntur

mbokmenawa dhalange lagi kelangan greget

nganti kawetu suwara sepet

kang padha nonton ngantuk

niyagane sesautan watuk

gareng, petruk saha bagong

ngati-ati anggone omong

kurang begjane bisa mbilaheni

kapunggel tembang campur sari

wis dadi tekdire semar

menungsa setengah dewa

samubarang kudu sarwa samar

blaka walaka kagolong langka

 http://www.panjebarsemangat.co.id/geguritan/page/30

Wejangane Ndara Sasra

Apa ana ta

Wong nglurug tanpa bala

Digdaya tanpa aji

Menang tanpa ngasorake

Sugih tanpa bandha

Pancen kuwi wejangane

Tumrap sing wis kulina nyipati dhewe

Krungu dhewe ing pagurone

Padha mratelakake guna paedahe

Kanggo sing durung tepung

Durung ngreti durung dunung

Sing sangsaya akeh cacahe

Kamangka karasa cocog banjur kepriye

Prelu maguru

Ana sing njlentrehake nggenah-nggenahake

Ana sing ndunung-ndunungake

Babagan hakekat surasa lan paedahe

Apadene mungguh laku-lakune

Kamangka ora ana gurune

Amarga murid kuwi gurune pribadine

Guru kuwi muride pribadine

(eneng ening enung enang enong)

“Know yourself control yourself and be yourself “

Ngudi trap trep jumbuhing jagad cilik lan jagad gedhe

Bisa bae alon nanging klakon

Kena bae cepet anggere slamet

Banjur bisa anggelar lan anggulung kasebut iki

Anggelar pamandeng angringkes pamantheng

Ambuka netra anutup soca

Angukup kabeh anyandhak siji

Wis

Muga padha bisa

Necep neges nderes wejangane Ndara Sasra *)

*) Asma genepe Drs. Raden Mas Panji Sasrah Kartana (1877-1952)

http://www.panjebarsemangat.co.id/geguritan/page/20

Muga-muga Kabeh wae Bener lan Pener

Duwe bale-wisma sawijining kanugrahan

Jungkir walika

Sirah digawe sikil

Sikilr digawe sirah

Yen durung oleh nugraha-Ne, ora klakon.

Aja kendhat olehe ndedonga,

Mula bareng klakon, duwe papan panggonan

Mujia syukur mring kang paring nugraha

Apa bener, ta?

Omah iku minangka kraton

Kanggo sumene, kanggo ngiyub, aja nganti kepanasan apa maneh kodanan

Mula kudu diopeni sarta digemateni

Kareben krasan betah nyang omah

Supaya ora kesaput angin mawa wisa.

Apa bener, ta?

Papan panggonan iku

Minangka papan panggulawenthah. Nyang putra, nyang kulawarga

Babagan karakter (jujur, welas asih sapadha-padha, sopan lan wasis)

Kaya kang diwejangake para Nabi

Yen kena bakal kerasukan kanisthan

Sawangen ing njaba omah, kebak sesawangan tawuran, regejegan

Apa bener, ta?

Muga-muga wae kabeh bener lan pener

http://www.panjebarsemangat.co.id/geguritan/page/30

Pangajap

http://www.panjebarsemangat.co.id/pangajap

Wis kadhung dakprepegi

Tumandang reh gegrayang

Ndhedher ajining jiwa rineksa

Ing tlatah pategaran

Kanthi pandulu

Ngeja kumelaning kukus dupa

Ana daya gumreget

Awit ing kana tinemu rasa

Ing kedhung banyu isih megung

Nglarah papaning kayuwanan

Mrepegi lampah tan baen-baen

Ngudi kinabul wenganing tawang

Ngambali rerangken lekasing laku

Sarta kang kinosekan katresnan

Ngrungkepi sabaya kewuh

Lepas saka panduwa lan panyakrabawa

Mengko samangsa pupus wis ngerak

Kalamangsane kudu angon wektu

Wis ora wayahe ngrenda crita lamba

Dina iki bali kaya wingi uni

http://www.panjebarsemangat.co.id/pangajap

Wengi Sepi

Kodhok ngorek ing tengah wengi

Mahanani getering ati

Wengi sepi ing perenging giri

Ijen tanpa kanthi

Ati iki nglangut tanpa tepi

Ah, sayektine aku nora sawiji

Ana Gusti kang tansah anjampangi

Nalika sholat Tahajud ing wengi suci

Mung pasrah sumarah kabeh pepesthi

Dak bukak lembaraning urip ing mangsa kawuri

Kebak dosa kang wus dak lakoni

Nanging aku manungsa lumrah

Tan kalis ing luput lan salah

Muga Gusti paring berkah

Kersa nampi anggonku ngibadah

Tumuju dalan kang mutma’inah

http://www.panjebarsemangat.co.id/wengi-sepi

Sing Nyata lan Sing Ngayawara

Manuk dhandhang menclok wuwung karo nggandhang

Ngobral tembang Maskumambang

Manuk bence colat-colot mbale mbale

nggawa crita ora karuwan jluntrunge

Manuk gagak gaok-gaok menclok cagak

adol unthuk ngomong ladak

jarene ana clurut kesrondhol bajul mangkak

Manuk prenjak ngguya-ngguyu jingklak-jingklak

ider oplosan legen karo tuwak

Jarene manuk dara kang neba ana ara-ara

ana preman ngejawantah jejer punggawa negara

duwe kadigdayan bisa nguras segara

Ora kaya si manuk jalak, adol aksi meh klenggak

lungguh jegang nantang-nantang

heee…sapa sira sapa ingsun????

Aku iki duwe aji-aji idu geni…

Dak semprotna, kabeh kang dak jangka dadi…”

Ana tembang rawat-rawat

sing ati-ati donyane meh kiyamat

tasbeh mung gumlethak ora kerumat

iku kabeh tandha bukti

kang soleh koncatan pakarti

Iku kabeh nyata apa ngayawara

ora percaya sumangga kersa…

http://www.panjebarsemangat.co.id/geguritan/page/4

Tuladha

awakmu dudu artis, dudu pesinetron

dudu bintang film

sing byar saben esuk gawe gandem

kanggo sing ora cekel gawe saben dinane

awakmu mung menungsa lumrah

kepengin obah

yen rambut wis wiwit putih,

ayo pikiran ndang ngalih

geber ndonya mung kari sak pada

dadi cupet kanggo ngisi crita

yen kulit gulumu pating njekethut

ayo cancut

sak renteng emas simpenanmu mbok titipake sapa

yen ujug-ujug ambeganmu pamit lunga

sb : http://www.panjebarsemangat.co.id/tuladha

Terusna

Gurit pangkur cinarita

Barsubuhan rasa sih rada arip

Tumuli nerusken turu

Nganti meh byar raina

Tangi turu age-age nyandhak sapu

Nyapu latar pekarangan

Ben katon resik gumrining

Desaku kang rada miring

Saiki,

Kahanan wis rada beda

Desaku wis owah meh kaya kutha

Kebon-kebon rungkut wis padha ditata

Didegi bangunan omah lan pager bata

Mung emane

Adege bangunan malang megung tanpa arah

Mung anut jembar ciyuting lemah

Tata ruwang kurang teliti

Resike lingkungan kurang diperdi

Engga kurang merbawani

Beda dhek jaman semana

Ngancik jaman modernisasi desa

Masyarakat guyub rukun mbangun desa

Dalan ciyut dadi amba

Mendhak-mendhukul longsor jeblog dari rata

Ditatani sela, nadyan prasaja ning miguna

Gethek-gethek omah dilabur padha

Nut dhawuhe kang lagi kuwasa

Sebab ana lomba desa

Mlebu desa dibangun gapura

Cakrik joglo jaman kuna

Gagah mregagah kebak wibawa

Gawok ingkang amriksa

Sung pambagya mring janma kang andon lelana

Gurit pangkur wis meh mungkur

Awit wis rapuh kepangan umur

Nadyan pepenginan isih dhuwur

Wis ora kuwagang reresik latar omah lan dhapur

sb :http://www.panjebarsemangat.co.id/terusna

Sak Pungkurmu

Sasurute Sang Ywang Arka

Ora krungu ocehing kukila

Embuh…, yen wus padha kemba

Wanci jumedhuling purnama

Adhuh…, tumlawung ing dhadha

Raga kang wus lamba

Den rasa, saya nalangsa

Imbane, lir pinilara

Binarung ruming kidung suci

Asung sasmita adi

Rarah…, ririh.., juwarehi

Ora lestari, kehing dumadi

Tan bisa den selaki

Owah gingsiring pesthi

Mampir ngombe…, bebasane

Amung sekar, sekar rinonce

Rahsa katrem, tekan semene

Tan kuwawi…,pasrah…sumendhe

Ombake asmara, tan sare

Nahan kang wus sumare

Oncat…jiwa ragane

http://www.panjebarsemangat.co.id/sak-pungkurmu

Angele Dadi Satrya

Jare satriya kuwi…

ora wedi kelangan sandhangan

sabab sandhangane satriya mung iman

jare satriya kuwi ora lumuh

amarga satriya kudu kuwat

Apa iya satriya kuwi kudu mangkono?

kok ya angel lakune dadi satriya

Najan iman wis kandel

kelangan sandhangan isih isin

merga katon wadine

Najan dikuwat-kuwatake

ing samubarang gawe

isih wae nglokro

merga kere

Satriya apa kudu sugih bandha?

ya mesthine merga bisa pamer mrana-mrene

satriya apa kudu putra pejabat?

ya mesthine merga jare kuwat

… kuwat anggone nindhes rakyat?

http://www.panjebarsemangat.co.id/angele-dadi-satrya 

Ayat-ayat Gusti Allah

Nalika bun wayah esuk tumetes

Mung suket, godhong lan kewan gegremetan kang atur syukur

Manungsa wus kadhung ndengangak ngukur bantala

Ngetung etung isine gelaring jagad kang semrawut

Kabuntel nalar kang kebak paeka

Ah…wus dudu bun kang tumiba

Nanging banjir bandhang ngebaki ratan lan kali

Ayat ayating Gusti Allah kang teka…?

Nggawa banten kang tanpa kanyana-nyana…

Amarga saka pokale wingi uni kang lagi lali

Yen ta kabeh mau ijih ana kang kagungan karya

Aja dha sembrana midak bantala tanpa cecala

Ngawiyat ya mung dha golek suka…ah

Kapan ati iki kober ngukur dosa…?

Nalika para wikan lan winasis kandha… yen ta donya iki wus kari sagegeming asta

Tandha tandha kiyamat kang bakal teka…

Ayo ndang ngudi salira lan jiwa… sujud kanthi ati tumenga…

Nedya ndandani tumindak kang duraka…najan kari umur kang sisa…

http://www.panjebarsemangat.co.id/geguritan